كي تجي تقرى كلام مذابيك تبدى من صورة الغلاف .. الكلام موش نابع من الفم نابع من الجواجي الشاعرة  .. كلام نابع من الداخل من احساس خالص من غير روتوش. كلام يخليك تبحر مع إيقاع الكلمة ووقع الحرف .. كي تقرى كلام لسلمى الماطري تحس بالستيلو " الفايض " حب حزن تمرد وحرية. بحبر فايض وكلمة حية، سلمى الماطري عبّرت عن المشاغل والأحاسيس إلي تهمها كيما الوطن القضية الفلسطينية العنف المسلط ضد المرأة .. عبّرت بطريقة عفويّة من غير تنمق وإستعراض لقدرات لغويّة وفكريّة وهوني يكمن قوّة " الكلام " .. كلمة سلمى الماطري توصل دغدغ وجدان القارئ بباسطتها وقوتها في نفس الوقت

أكثر القصائد إلي عجبوني هم القصائد ذو صبغة تحفزية إلي كي تقراهم تحس بروحك أحسن وحتى شيء مايصعب عليك كيما قصيدة " نتمنّى " : نتمنّى نكون الفاعل مش المفعول، أول حرف في غناية وآخر ياجورة في بناية، نألّف روحي حكاية ورا حكاية، ويكمل الكتاب ماغير مانفسّخ حتّى سطر "

كلام .. هو ليس فقط كلام بقدر ماهو فعل وارادة حياة تغامرك كلّما فتحت الكتاب لتقرأ مجدّدا القصائد لتسافر مع الشّاعرة في رحاب الكلمة الفاعلة والحلمة الممكنة